Vrydagaand was die jaarlikse ATKV-toekennings, of beter bekend, die Veertjie-toekennings.

En vir die van julle wat nie daar was nie of nog nie ’n Veertjie-aand bygewoon het nie, dis ’n groot toe-doe in Vodaworld en almal tof op.

Die jaarlikse Veertjie-prysuitdeling is ’n hoogtepunt op baie mense se sosiale kalender om verskeie redes….

In die eerste plek is dit altyd wonderlik om te sien hoe akteurs, regisseurs, koerant- en tydskrifjoernaliste sowel as radiojoernaliste vir hul uitmuntende werk deur die ATKV vereer word.

In die tweede plek is dit die kuier van die jaar…ja want elkeen wat iemand is in die bedryf is daar en dit is altyd lekker om bekende gesigte te sien en ou kennisse en vriende in die bedryf by die reuse-paartie raak te kuier.

Hans Strydom, of die stuurse At van Binnelanders, was die eerste bekende wat ons raakgeloop het. Sonder metgesel, stoksielalleen, daag hy by die funksie op. En ek moet sê, die jare doen At net goed, want hy is vandag vir my nog net so handsome as die dae toe hy in Jan Scholtz se fliek More more saam met Sybil Coetzee gespeel het en al die skoolmeisies (die uwe inkluis) wat saam met my op die skoolbanke gesit het, op hom verlief was.

Nadia Velvekens, ofte wel Pippa van Binnelanders, het aan die tafel agter ons s’n gesit. Beskeie, stil, stylvol en sjarmant aan die sy van haar kêrel ….sy is glad nie van daardie tipe aktrises wat “loud” is en vir almal wil wys hulle is hier nie!

Nog een van my gunstelingaktrises, Jana Strydom, wat eers in Egoli gespeel het en nou haar ding doen in Sewende Laan en Erfsondes, (tussen hakies ek’s mal oor haar karakter, Kate, in Erfsondes) het dadelik die oog gevang in ’n pragtige uitrusting - myns insiens een van ons mooiste en ook stylvolste aktrises.

Eloïse Kupido het my omtrent stormgeloop terwyl ek besig was om kollega Hanlie Retief na die prysuitdeling met haar Veertjie geluk te wens. Eloïse het ook baie mooi gelyk, maar ai, ek en Hanlie kon skaars ’n woord in kry! En as daardie bekkie eers begin praat, suster, dan kry jy hom nie sommer toe nie! Maar ai, ons is almal lief vir die bekkige Eloïse!!

Moet sê, die wenner wat seker die meeste aandag na die prysuitdeling geniet het, was Elna Boesak, wat ’n Veertjie gekry het vir haar program Die Vrystelling van die Slawe op RSG. Gaste het omtrent tou gestaan om haar geluk te wens…of was dit dalk ook om so bietjie politiek met haar eggenoot, eerwaarde Boesak, te praat en bietjie nabetragting na die nasionale verkiesing te hou?

Die glansaand het ’n hele paar verrassings opgelewer, soos die yslike verrassing dat die tydskrifprogram Pasella toe vir die veelbrekroonde Kwêla in die stof laat byt het en dat die aantreklike oud-model Minki Visser toe vir die gesoute en knap Coenie de Villiers as beste aanbieder of onderhoudvoerder van ’n TV-tydskrifprgram die loef afgesteek het. wys jou net, daar’s nuwe winde wat ’n paar nuwe vere begin inwaai!

Ek was baie bly toe Iris Bester, veteraan-radiopersoonlikheid met nie minder as drie Veertjies weggestap het nie. Wat ’n wonderlike manier om ’n veelbewoë loopbaan in die bedryf af te sluit, want Iris het pas verlede week haar uittrede aangekondig.

En laaste maar nie die minste nie, sommer vyf hoera’s aan dramaturg/regisseur/vervaardiger Deon Opperman en sy span wat vir die kykNET drama Kruispad net mooi vyf Veertjies ingepalm het! En welgedaan Cobus Rossouw, wat as die beste regisseur (Kruispad) aangewys is…wys jou die appel val nie ver van die boom nie en ek is seker pa Cobus en ma Sandra is baie trots op hul seun.

Lizz Meiring, gesoute aktrise en regisseur, het agter die skerms baie hard gewerk om die hele vertoning met kunstenaars soos Sonja Herholdt, CH2 en Emo Adams sowel as die prysuitdeling seepglad te laat verloop. Well done, Lizzie!!